Contador é un cubo de tres metros de lado, instalado en espazos públicos de trinta localidades de Galicia, no que se elabora un conto colectivo. Partindo dun comezo provisto polo propio Contador, cada participante narra unha parte da historia coa única referencia do fragmento de relato inmediatamente anterior, o que pode dar lugar a derivacións máis ricas e divertidas.

Con Contador, a Secretaría Xeral de Política Lingüística pretende promover o uso da lingua galega nos lugares públicos, fomentar a creatividade e asociar o idioma propio do país ao uso das novas tecnoloxías, ademais de aproveitar a riqueza oral do idioma e o talento dos galegos e das galegas como contadores de historias.

Como funciona?

1. Entra no Contador.

2. Escoita o fragmento de historia contada inmediatamente antes e continúa o relato.

3. Sae do Contador.

4. Busca a túa historia en www.galegoelogo.com e compáraa coas que se contaron noutras vilas e cidades de Galicia.